ENTREGA DE TRABALLOS POR CORREO

Debido á extensión do Estado de Alarma, a entrega dos traballos 18 e 19 terá que facerse por correo electrónico. Teredes que enviar unha foto de cada debuxo nun mesmo correo á miña conta de Gmail ou escanealo con Google Drive se preferides:
mariaalvarez@iesadormideras.es
A data de entrega segue a ser o 30 de marzo
Estoume poñendo ao día co uso das Aulas Virtuais por se nos resultase máis útil como canle de comunicación, xa vos avisarei se hai cambios.

Chéganos unha oferta de cursos online gratuítos para estudantes de 1º e 2º de bacharelato. Son para programar videoxogos e animación 2D/3D. Deixo aquí o enlace por se algún de vós está interesada/o.

Traballo 19. Prácticas de acuarela do natural e na casa

Esta semana deberíamos estar practicando o debuxo do natural coas nosas acuarelas nos arredores do Instituto. Como non pode ser, teremos que facelo do "natural" que nos rodea. O Traballo 19, para esta semana, consiste en facer tres acuarelas do natural:
- Unha dun bodegón -froitas, tazas, botellas, etc - e cunha técnica clásica (só acuarela, sen liñas a tinta)
- Outra, a vista desde un lugar da casa que permita ver o exterior con contornos de tinta (exemplo abaixo: vista desde o meu sofá)
- Outra libre, pode tamén ser un apunte rápido.
Lembrade que se debuxades a tinta antes de dar a cor haberá que asegurarse de que esta é waterproof para evitar manchas ao engadir a acuarela.
Teredes que empregar papel de acuarela, non é necesario que sexa un formato grande (entre DINA5 e DINA4, é dicir: o lado menor da folla medirá como mínimo 15cm e o maior como máximo 30cm).

Estas tres non se farán no Sketchbook e OXALÁ sexa posible entregalas en man o vindeiro luns 30 de marzo. Se non o é xa vos indicarei cómo entregalas de xeito virtual.
Déixovos aquí o enlace a PINTEREST para que botedes un ollo antes de facer o traballo.

Todos os que estades no proxecto Sketchbook aproveitade para practicar debuxando as cousas que vos rodean e escribide as sensacións e pensamentos que vos rondan (coidade a tipografía e o aspecto da parte escrita), ésta é unha situación sen precedentes e o debuxo e a escritura dan unha vía de escape ao desacougo. Coidádevos moito!!!

Engado aquí algúns dos mellores debuxos entregados:

Recuperación de Avaliacións suspensas

Para recuperar a 1ª e/ou 2ª Avaliación haberá que entregar os traballos non entregados ou cunha nota inferior ao 5 na semana do 20 ao 24 de abril. Os que teñan suspenso pola nota dos exames terán que presentarse ao exame final de curso (figura a carboncillo en DINA2) nas datas que fixe o centro máis adiante.
Aquí tedes a táboa co alumnado que debe recuperar algunha avaliación:

Traballo Voluntario. Certame Hábitat 2020

Como xa coñecedes a mecánica do Certame Hábitat, colgo aquí as Bases do concurso deste ano 2020. Non é obrigatorio, pero quen queira participar, presentará cando nos reincorporemos ás clases normais (e antes do 30 de abril) un mínimo de dous debuxos a DINA4 e en técnica libre. Na materia de DEAII poderá supor unha puntuación extra para a 3ª Avaliación de 1 punto (máximo 0,5 puntos cada debuxo).

Traballo 18. Prácticas de acuarela

En 2 DINA4 (ou 1 DINA3), reproduce a 1ª e 2ª acuarelas o máis fielmente posible, deixando un espazo branco arredor do debuxo e pinceladas da paleta empregada. Data de entrega: Luns, 16 de marzo AVISO: A entrega queda aprazada para o día 30 pola suspensión de clases decretada polo Goberno
Déixovos aquí uns "trucos" básicos para a acuarela.

Traballo 17. Probas de Acuarela

PROBAS DE ACUARELA. En papel de acuarela, facer as seguintes prácticas:

Formato: 1 DINA3 ou 2 DINA4 (papel de acuarela). As probas guiadas son as que aparecen aquí arriba (DINA4) con outro formato igual faranse as nove probas libres. ENTREGA: Luns, 9 de marzo

Traballo 16. Bodegón cubista

Bodegón cubista

Realizar un bodegón tendo en conta as premisas básicas do cubismo: diversidade de puntos de vista e paleta reducida. Técnica libre (acuarela, acrílico, ceras, collage, mixta...)  DINA3. Entrega: Martes 3 de marzo

A continuación tedes algúns exemplos de bodegóns cubistas:

Traballo 15. Bodegón PAU

Realizar un bodegón en DINA3 (grafito ou carboncillo) elixindo tres dos seguintes elementos frutais:

• Dúas laranxas
• Unhas peras
• Un acio de uvas
• Uns plátanos
• Un ananás
• Unhas ameixas

 Todos deberán estar dispostos nunha superficie horizontal, tendo especialmente en conta a composición, as proporcións e as relacións de claroscuro. ATENCIÓN: Cambio na data de entrega: mércores 19 de febreiro.

Video de ritmos no debuxo de espido

Para completar as vosas prácticas en debuxo de espido tendo en conta os ritmos fluídos da figura

Video de repaso

Traballo 14. Debuxo de espido / Sketchbook

Para quen esté apuntado no Proxecto Sketchbook: Entrega do sketchbook cun mínimo de 36* páxinas con debuxos (sobre todo) do natural.
* (73 días desde o 15 de novembro)

Para o resto do alumnado:
Nos seguintes enlaces, buscar unha pose e facer un debuxo de espido en DINA3 e técnica seca (grafito, lápices de cores, acuarelables ou conté)

Poses de CHICA
Poses de CHICO

Data de entrega: 27 de xaneiro